Украинците шокирани од она што Русите го оставиле во нуклеарката Чернобил

Ненадејниот звук на мерач на радијација што ги пробива ушите ја исполнува просторијата додека влегува украински војник. Руски војници живееле во нуклеарната централа во Чернобил, а нивото на радијација сега е повисоко од нормалното.

Прегледи:
3974
Објавил:
Administrator

09 април 2022, 20:15
Сподели
Сподели

Во просторијата нема видливо присуство на радиоактивен материјал, но украинските власти велат дека радијацијата доаѓа од малите честички и прашина донесени во зградата од војниците.

„Тие отидоа во Црвена шума и донесоа со себе радиоактивен материјал на чевлите. Сѐ друго е во ред, но радијацијата е зголемена овде бидејќи тие тука престојуваа“, објаснува војникот Ихор Уголков.

На CNN му бил даден ексклузивен пристап до нуклеарната централа за прв пат откако беше повторно под контрола на Украина.

Официјални лица во електраната објаснуваат дека нивоата во просториите што ги користат руските војници се само малку над она што Светската нуклеарна асоцијација го опишува како природно зрачење. Еднократниот контакт не би бил опасен, но континуираната изложеност би претставувала опасност по здравјето.

„Оделе секаде, а радиоактивната прашина ја носеа со себе кога си заминаа“, додаде Уголков.

Тоа е пример за она што украинските власти го опишуваат како опуштено и невнимателно однесување на руските војници додека го контролирале местото на нуклеарната катастрофа во 1986 година. Областа околу Чернобил, или Црвената шума, сè уште е најконтаминираната област со радиоактивност во светот, а повеќето радиоактивни честички се присутни во почвата.

Украинските власти објавија снимка од беспилотно летало од, како што велат, рововите ископани од руските војници во областа, која е особено радиоактивна. На безбедна локација, на работ од областа, Си-Ен-Ен виделе руска воена кутија за оброци која покажува нивоа на радијација 50 пати над природните вредности.

Руските војници го држеа Чернобил еден месец и се верува дека најчесто оперирале во контаминираните области.

„Навистина е лудо. Навистина немам поим зошто го направија тоа, зошто отидоа во Црвената шума. Но, можеме да видиме дека влегле таму. Војниците отидоа таму, се вратија овде и нивото на радијација се зголеми“,изјави министерот Герман Галушченко за Си-Ен-Ен.

Иако Чернобил повеќе не е активна електрана, саркофагот над реакторот кој експлодира пред речиси 36 години треба да се одржува за да се избегне дополнително истекување на радијација. Има и значителна количина на потрошено нуклеарно гориво на кое треба да се внимава.

„Тој саркофаг треба да има струја, да има систем за вентилација и слично. Иако не можевме да го контролираме, ние сме одговорни, Украина е одговорна за безбедноста, се разбира, тоа е закана“, објаснува Галушченко.

Дел од таа закана доаѓа и од начинот на кој руските војници се однесувале кон одговорните за одржување на нуклеарните постројки.

„Нашиот персонал е тука од првиот ден на окупацијата, а имаа можност да бидат сменети дури еден месец подоцна. Кога луѓето се физички и морално исцрпени, кога ви се закануваат со пиштоли, тогаш тоа е навистина напорна работа“, вели Галушченко за Си-Ен-Ен.

Володимир Фалшовник (64) е водач на смена во Чернобил. Тој се вратил во електраната на 20 март, кога руската армија дозволила уморниот персонал да се менува со колегите од блискиот град Славутич, каде што живеат многу работници во централата.

Тој вели дека персоналот работел под огромен притисок, не само поради она што се случувало во Чернобил, туку и поради вестите што ги добивале од надворешниот свет.

„Почнаа да ни се јавуваат роднини и да ни кажуваат дека градот се бомбардира, дека има ранети и мртви. Ги прашавме Русите што се случува, а тие рекоа дека таму нема руски војници, но сепак слушавме приказни дека има гранатирање. “, рече Фалшовник, обвинувајќи ги руските војници и дека ја ограбиле електраната.

„Ни дадоа персонал од Росатом, руската нуклеарна агенција, да не придружува. Ги придружувавме до магацините. Тие постојано ги ограбуваа тие складишта“, додаде Фалшовник.

Акцијата во овие услови беше интензивна, но ништо во споредба со она што го издржа заштитниот персонал.

Според украинскиот министер за внатрешни работи, 169 војници на украинската национална гарда кои го обезбедувале објектот биле заклучени во подземен нуклеарен бункер од времето на Студената војна, сместени во тесни простории без пристап до природна светлина, свеж воздух или комуникација со надворешниот свет.

„Тие беа држени овде 30 дена без доволно светлина и храна. Не им беше дозволено да излезат. Последниот ден беа однесени оттука во непознат правец“, вели Денис Монастирски, стоејќи во бункерот.

Министерот вели дека верува оти мажите биле одведени во Русија, преку Белорусија, како воени заробеници, но не може да го каже тоа со сигурност: „Денес, за жал, не знаеме ништо за нивната судбина“.

Си-Ен-Ен доби пристап до бункерот и други места каде што обично се вработените во електраната. Украинските власти тврдат дека руски војници го ограбиле ова место. Облека, средства за хигиена и други лични предмети се расфрлани по подот.

„Руската армија помина низ целата украинска облека, лични предмети, веројатно во потрага по пари, скапоцености, лаптопи. Овде имаше грабеж. Руската армија украде компјутери и опрема“, продолжува Монастирски.

Москва кажува многу малку за она што го направиле нејзините трупи во Чернобил. Последен пат руското Министерство за одбрана го спомена ова место на 26 февруари, потврдувајќи ја неговата окупација и тврдејќи дека гарантирало безбедност на енергетските единици, саркофазите и магацините за нуклеарно гориво.

Украинските власти велат дека однесувањето на руската војска и третманот на украинскиот персонал во електраната во Чернобил ја нагласува опасноста од инвазијата на Москва, бидејќи руската војска ја презема контролата врз објектите и во други области.

Покрај затворањето на реакторите во Чернобил, Украина има четири активни нуклеарни централи, вклучувајќи ја и најголемата во Европа, во Запорожје. Руската војска го зазеде објектот на почетокот на март, кога ја презеде контролата врз целата област, гранатирајќи некои од зградите околу електраната.

„Ситуацијата таму е исто така страшна, особено ако се земе предвид начинот на кој тие ја окупираа Запорожје бидејќи пукаа во електраната со тешко оружје. Тоа е навистина чин на нуклеарен тероризам“, рече министерот за енергетика Галушченко.

И покрај тоа што Украина ја врати контролата врз Чернобил, украинските власти стравуваат дека руските војници би можеле да се обидат да се вратат.

„Мораме да бидеме подготвени за нов напад на нуклеарната централа во секое време. Ќе го искористиме најдоброто искуство во светот за да се осигураме дека централата е заштитена бидејќи границата е оддалечена само неколку десетици километри“, рече министерот за внатрешни работи Монастирски.

„Она што го видовме во Чернобил е жив пример за срамното однесување во нуклеарната централа. Одговорност не само на Украина, туку и на целиот свет е да ги чува електраните безбедни. Целиот свет во живо гледаше како тенкови пукаат врз нуклеарните централи во Запорожје. Ова никогаш повеќе не смее да се повтори.“

Монастирски вели дека неговата земја има потреба од континуирана меѓународна поддршка: „Ние сме подготвени да инвестираме во иднината на Украина и идната безбедност на светот. Денес зад нас е границата меѓу тоталитаризмот и демократијата, границата меѓу слободата и угнетувањето. Ние сме подготвени да се бориме за тоа“.