Велешанецот на возраст од 59 години, кого вчера неговиот внук го пријавил во полиција за исчезнат, денес бил пронајден починат на автопатот „Пријателство“. Како што информираат од СВР Велес, тој излетал со своето возило и од здобиените повреди починал.
– Денеска (07.12.2023) во 14.45 часот во СВР Велес било пријавено дека на автопатот `Пријателство`, во правец од Скопје кон Велес, на околу 1.400 метри после исклучок за езеро Младост, било пронајдено излетано возило од патот, `форд фокус` со велешки регистарски ознаки. Во несреќата, од здобиените повреди починал возачот П.Д.(59) од Велес, за кој на 06.12.2023 неговиот внук пријавил дека се оддалечил од домот. Смрт констатирал лекар од Итна медицинска помош-Велес, а увид на местото извршиле јавен обвинител и увидна екипа од СВР-Велес. По наредба на јавен обвинител телото е предадено на обдукција – известија од СВР Велес.
Околу тоа кога точно изчезнал човекот кој според пријавата од внукот живеел сам, и дали и било пријавено дека го нема и неговиот автомобил, не успеавме да добиеме одговор од надлежните.