ФОТО: Млада позната Албанка (34) мистериозно го загуби животот при пад од тераса во хотелот „Венус“

34-годишната Артила Камбери од Ѓаковица го загуби животот во четвртокот, откако наводно скокнала од терасата на вториот кат во хотелот „Венус“. Но овој настан се уште се нарекува мистериозен, бидејќи не се знае зошто младата жена скокнала од терасата по караницата со своето момче.

Државниот обвинител Арменд Хамити рече дека чека да се извршат испитувањата, а за случајот се сослушани и сведоци, пишува весникот „Сињали“, но досега не се сослушани лица во својство на осомничени. Обвинителот рече дека случајот се истражува како „Истрага за смрт/самоубиство“ и врз основа на резултатите ќе бидат откриени и другите околности на случајот.

„Случајот се води со сомнеж како истрага за смрт/самоубиство. Нема уапсени лица. Во случајот нема осомничени. Ние сме во фаза на истрага. Ќе провериме, сега ги чекам резултатите, вештачењето, дали има нешто друго“, рече тој.

Во рамки на истрагата за случајот, земен е исказот на Асдрен Беголи (32) од Пеќ кој во критичниот момент бил со жртвата, како и исказите на уште две лица. Починатата била добро позната во градот Ѓаковица, бидејќи имала сопствен приватен бизнис за естетски услуги, но во минатото имала и јавни настапи во некои од медиумите.

Трагичниот настан се случил околу 03:30 часот, при што се сомничи дека Артила Камбери и Асдрен Беголи биле вмешани во вербален конфликт меѓу себе. 34-годишната наводно скокнала од терасата на хотелот и како последица се здобила со тешки телесни повреди кои се испоставиле како фатални за неа.

Екипата на Итната медицинска помош излегла на местото на настанот, каде го пронашла телото на жртвата и по преглед на виталните знаци ја констатирала за мртва.

Во врска со случајот, полицијата соопшти дека со одлука на државен обвинител, мртвото тело на жртвата е испратено на обдукција во Институтот за судска медицина.

„Во моментов полицијата во координација со Обвинителството започна и ги презема сите соодветни истражни дејствија кои би помогнале во истрагата и расветлувањето на случајот, додека мртвото тело на жртвата е испратено на обдукција“, соопштија од портпаролката Флора Ахмети.