Француската влада прогласи вонредна состојба во Нова Каледонија по повеќедневните вооружени судири меѓу демонстрантите и полицијата!

Властите воведоа полициски час во главниот град Нумеа и го затворија главниот аеродром за комерцијален сообраќај поради најголемите немири на островот во Пацификот во последните 40 години. Тие исто така забранија јавни собири и продажба на алкохол. „Тик Ток“ е исто така забранет.

За време на немирите, според неофицијални информации, загинале 10 лица, а повеќе од 200 се повредени. На снимката се гледаат запалени згради и автомобили и блокади на патиштата. Се наведува дека меѓу жртвите има и двајца француски жандарми.

Француското Министерство за внатрешни работи соопшти дека во Нова Каледонија веќе се присутни 1.800 полицајци и жандарми и дека пристигнуваат уште 500 припадници на специјалните сили.

Вонредната состојба ќе им овозможи на властите да воведат ограничувања за движење и да вршат куќен притвор и претреси.

Протестите на домородната заедница Канака, која со години се бори за независност и сочинува околу 40 отсто од населението, започнаа во понеделникот поради гласањето во францускиот парламент на 17.000 километри одалеченост за измените на уставот на Нова Каледонија, кој ќе им даде право на глас на француските доселеници кои живеат на островите повеќе од 10 години.

Домородното локално население смета дека на овој начин ќе биде лишено од влијание врз политичките процеси во државата.

– Во последните два дена видовме насилство од такви размери какви што не сме виделе 30 години во Нова Каледонија. Тоа на некој начин го означува крајот на 30 години мир. Народот Канак се противи (гласањето во Франција) не само затоа што е одлучено во Париз без нив, туку затоа што сака тоа да биде дел од преговорите што ќе доведат до нов референдум за самоопределување – поранешен генерален конзул на Австралија во Нова Каледонија Дениз Фишер изјави за Си-Ен-Ен.

Предложените уставни измени ќе додадат илјадници дополнителни гласачи во избирачките списоци на Нова Каледонија кои не се ажурирани од доцните 1990-ти. Групите за независност велат дека промените се обид на Франција да ја зацврсти својата контрола врз архипелагот.

Францускиот министер за внатрешни работи Жералд Дарманин го обвини Азербејџан дека стои зад сепаратистите, додека изворите на „Политика“ меѓу француските официјални лица тврдат дека антиколонијалната реторика на Азербејџан е главно инспирирана од Москва. Париз е многу иритиран што Азербејџан, со помош на Иницијативната група Баку, која ја основа пред една година, го критикува францускиот колонијализам и им дава поддршка на поддржувачите на независноста на Нова Каледонија.

Многу демонстранти, наводно, веат азербејџански знамиња.

Политико пренесува изјава на француски разузнавач дека активноста на Русија и Азербејџан во Нова Каледонија трае со месеци.

Нова Каледонија е една од десетината полуавтономни француски територии расфрлани низ Тихиот и Индискиот Океан. За Париз, Нова Каледонија е важна воено и геополитички, но и поради наоѓалиштата на никел.