Автобус со работници на Индитекс се заглавил во сообраќајна несреќа денеска на влезот во тунелот во речиси вертикална положба кај Пинеда де Мар, 73 километри од Барселона, во која се повредени 45 лица, извести Брзата помош.

Автобусот со 47 патници патувал од Барселона до градот Тордера во североисточниот регион на Каталонија, каде сопственикот на модниот бренд Зара има фабрика. Несреќата, чија причина полицијата во моментов ја истражува, се случила во 8 часот и 45 минути.

На десетици повредени лица им била укажана помош во близина или биле префрлени во околните здравствени домови.

Тројца патници во критична состојба со хеликоптер се пренесени во болниците. Шефот на пожарникарството Жорди Марти за медиумите изјави дека извлекувањето на патниците било тешко бидејќи автобусот останал заглавен во речиси вертикална положба потпрен на влезот на тунелот. Возачот последен бил извлечен.

Возачите се предупредени да ја избегнуваат областа бидејќи се очекува работата за отстранување на автобусот да трае неколку часа.

Градоначалничката на Тордера, Елизабет Мегиас, изјави за ТВЕ дека автобусот „се движел апсолутно нормално од Барселона до Тордера“.

На прашањето за причината за несреќата, таа одговори дека „зборуваме за чуден настан, но се истражува“.

Се чини дека автобусот се излизгал од патот, удрил во работ на тунелот и се превртел. Според досегашните информации, во несреќата не учествувало друго возило.