Циклонот БОРИС жестоко ќе удри во овие 5 европски држави: Се очекуваат неверојатни 400 милиметри дожд на метар квадратен!

Циклонот Борис носи драстични временски промени, бури и поплави во еден дел од Европа. Полска, Чешка, Словачка, Австрија и Хрватска ќе бидат најтешко погодени од циклонот Борис, а значителни врнежи се очекуваат и во Србија.

Поради заканувачките поплави, властите на овие земји веќе наредија подигање на бариерите, а армијата ќе биде во состојба на готовност поради поплавите.

Според чешките и полските метеоролози, во некои делови од нивните земји може да наврнат и до 400 литри дожд на квадратен метар во следните четири дена, а во Австрија и Словачка се очекуваат речиси 200 литри.

Културните настани закажани за викендов се откажани во тие четири земји поради предвиденото поминување на циклонот. Резервоарите за прием на вода, пред сѐ, во околината на браните, се испразнети за да може да се прими толкаво количество вода. Во Полска се објавени метеоролошки аларми за југот на земјата, пред сѐ, за градовите на Одра како Вроцлав и Ополе.

„Постои реален ризик од локални поплави в петок и в недела“, предупредија полските метеоролози.

Во Вроцлав, кој има 675.000 жители, Општината формира кризен штаб. Според чешкиот министер за животна средина, Петар Хладик, ситуацијата во земјата „може да биде слична на онаа од 1997 и 2002 година“.

Градовите во Моравија подигнаа бариери за поплави и подготвија вреќи со песок во пресрет на невремето, кое ќе биде придружено со ветрови до 100 километри на час. Откажани се десетици културни настани во регионот, вклучувајќи го и годишниот фестивал на виното, кој привлекува десетици илјади посетители.

Откажан е и Римскиот фестивал во Карнунтум, Австрија. Според австриската телевизија ОРФ, нивото на водата на Дунав би можело да се искачи на нивоа што не се забележани пет-десет години. Австрискиот канцелар изјави дека армијата е подготвена да распореди и до илјада војници доколку е потребно. Во состојба на готовност се и словачката армија и доброволните пожарникари.

Врнежите би можеле да бидат поголеми од оние што ја погодија централна Европа во 2013 година, кои тогаш се сметаа за најлоши во последните илјада години, предупредува словачката метеоролошка служба imeteo.sk. Со движењето на студениот бран низ Европа кон исток падна и првиот снег на словенечка Кредарица.

Невремето предизвика најмногу проблеми на словенечкото крајбрежје. Во словенечка Истра за само неколку часа наврна повеќе дожд отколку што обично паѓа во текот на целото лето, пренесуваат локалните медиуми.