Поднесен е нов предлог за зголемување на акцизите за цигарите во Бугарија. Од Коалицијата за живот без чад наведуваат дека со повисоката стапка ќе се обезбедат повеќе пари во буџетот, објави НОВА. Тие предвидуваат дека зголемувањето ќе доведе до намалување на пушачите. Идејата е акцизите за тутунските производи рамномерно да се зголемуваат во следните три години. Пресметките покажуваат дека една кутија цигари секоја година ќе поскапува за 70-80 центи.
Во моментов, проценките на Министерството за финансии предвидуваат пораст од околу 15-20 центи. Според сегашниот календар за акциза, една кутија цигари, која моментално чини 5,90 лева (186 денари), за три години треба да биде 6,60 лева (208 денари), доколку стапи на сила предлогот на коалицијата, истата кутија од 5,90 лева веќе ќе чини повеќе од 8,60 лева (271 денар).
Прогнозите покажуваат дека за три години од оваа мерка во буџетот ќе влезат близу милијарда и пол лева повеќе. Останува прашањето, сепак, ако акцизите нагло се зголемат, нема ли да се зголеми шверцот, прашува Телеграф.бг.
Некои ја поздравија идејата за поскапување на цигарите: „Ќе биде непријатно, но што да правиш, државата сака свое“, вели пушачот Георги. Сепак, повисоката акциза ќе ја намали дупката во буџетот, сметаат експертите. „Сите ќе победат. Дури и индустријата нема да изгуби многу. Купувачите ќе бидат тие што ќе ги платат повисоките цени. Впрочем, не зборуваме за фанатизам, туку за мало придвижување кон европско ниво“, коментира д-р Димитар Шабев.