Грција донесе одлука да ги изземе британските туристи од контроверзниот систем за влез и излез (EES) на Европската Унија, со цел да се избегнат долгите редици и хаосот на аеродромите пред летната сезона.
Според новите правила, сите патници кои не се државјани на ЕУ треба да поминат низ биометриска регистрација – отпечатоци од прсти и скенирање на лице – при влез во Шенген зоната. Но, грчките власти одлучија да направат исклучок за посетителите од Велика Британија.
Одлуката стапи на сила на 10 април 2026 година и значи дека британските државјани нема да мора да поминуваат низ дополнителните биометриски проверки на граничните премини во Грција, туку ќе продолжат со класична контрола на пасоши.
Овој потег доаѓа откако воведувањето на EES системот предизвика големи проблеми на европските аеродроми, вклучително и долги чекања, метеж и дури пропуштени летови.
Грчките власти очекуваат дека со оваа мерка ќе се намалат гужвите и ќе се подобри искуството на туристите, особено во пресрет на летната сезона кога милиони Британци традиционално ја посетуваат земјата.
Експертите сметаат дека ваквиот потег е прагматичен и има за цел да го заштити туризмот, кој е клучен сектор за грчката економија. Постојат и најави дека други туристички земји би можеле да размислат за слични олеснувања доколку проблемите со системот продолжат.
Инаку, EES системот е воведен за подобра контрола на границите, спречување на злоупотреби и полесно следење на престојот на странските државјани во ЕУ, но неговата примена засега предизвикува практични предизвици на терен.