„Нападот на Хамас врз Израел е сосема неочекуван за сите. И за политичарите и војниците, аналитичарите и безбедносните експерти. Затоа што е целосно нејасно што сака Хамас. Тие се свесни дека не можат да го победат Израел и дека одмаздата ќе биде страшна. Затоа, во моментов нивните мотиви се целосно нејасни“, тврди Мирко Даутовиќ, експерт за надворешнополитички односи.
Единствено што може да се погоди е изборот на датумот на нападот, со оглед на тоа што се паѓа на ден пред 50-годишнината од почетокот на војната во Јом Кипур која за малку ќе завршеше со пораз на Израел. „Со ова Хамас веројатно сака да испрати порака дека ова ќе биде крајот на Израел, што е невозможно“, посочува Даутовиќ. Според него, можно е Хамас со овој потег да сака да го спречи меѓусебното признавање на Саудиска Арабија и Израел и да ги наруши сите подобри односи на Израел со некои други арапски држави.
Според него, оваа акција на Хамас го изненадила дури и самиот Хезболах, кој само вербално го поддржува Хамас, додека Фатах со цело срце им посакува неуспех. „Во овој момент Хамас тешко дека имадури и еден единствен сојузник“, оценува Даутовиќ. Но, она што може да се случи како последица на овие настани е целосната геополитичка слика на Блискиот Исток. Имено, посочува Даутовиќ, одговорот на Израел на нападот на Хамас секако ќе биде брутален.
Тој предвидува дека тоа ќе вклучи и копнена инвазија во областа Газа, која би можела да ја искористи националистичката израелска влада за последната пресметка со Палестинците. „Не би бил изненаден доколку во таа копнена операција би се случило етничкото чистење на Палестинците, кое би било поттикнато од Владата на Бенјамин Нетанјаху. Во тој случај, до пет милиони Палестинци би можеле да мигрираат во Јордан и Египет. Режимите во тие земји веќе се на слаби нозе и таквото сценарио може да доведе до нивно соборување.
Во тој случај може да дојде до нова револуција во Египет и враќање на Муслиманското братство на власт, што повторно ќе го дестабилизира целиот регион“, нагласува Даутовиќ.
На прашањето кој ќе му помогне на Хамас во такво сценарио, Даутовиќ одговара: „Никој. Односно, само можеби Муслиманското братство ако ја освојат власта во Египет.
Хезболах е свесен дека не може да влезе во отворена војна со Израел, Турција ќе застане настрана како и Саудиска Арабија, и тешко е да се поверува дека Иран ќе влезе во војна со Израел“.