Од МВР попладнево соопштија дека жената која ја нападнала со тврд предмет пејачката Елена Ристеска била приведена, го признала делото и добила кривична пријава за насилство.
-На 24.10.2023 полициски службеници од СВР Скопје ја лишија од слобода Е.Т.П. (38) од Скопје постапувајќи по пријава од Е.Р. (37) од Скопје дека на 23.10.2023 во угостителски објект на подрачјето на Центар со тврд предмет била нападната од Е.Т.П.. Со Е.Т.П. е извршен службен разговор и таа го признала делото, а извршен е разговор и со сведоци на настанот. По документирање на случајот, против Е.Т.П. е поднесена кривична пријава за кривично дело „насилство“ по член 386 од КЗ и е предадена на ОЈО Скопје, известија од МВР во дневниот билтен.
Ристеска била нападната ноќта недела на понеделник во скопски кафе-бар од жена која се обидела да ја удри со тврд предмет. Пејачката го пријавила нападот во полиција каде кажала дека воопшто не ја познава насилничката.
Од обвинителството пак побараа судот на осомничената за насилство да и забрани приоѓање и контактирање со пејачката која имала повреда на главата.
-Основното јавно обвинителство Скопје поведе постапка против едно лице за кривично дело – Насилство од член 386 став 3 во врска со став 1 од Кривичниот законик.
Осомничената 38-годишна скопјанка, на 23 октомври во угостителски објект во Скопје, извршила грубо насилство кон една оштетена, физички напаѓајќи ја со тврд предмет и нанесувајќи и повреда на главата. Притоа упатила и вербални закани кон оштетената и кон други присутни лица, со што предизвикала чувство на несигурност, загрозување и страв.
Ценејќи ги сите околности, пред се можноста за повторување на агресивното и насилното однесување, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка на претпазливост – забрана за осомничената да се приближува или да воспоставува контакти со оштетената, соопшти обвинителството.