Неколку очевидци за Би-Би-Си изјавија дека слушнале експлозии во регионот на западниот град Лавов. Новинската агенција UNIAN, исто така, ги цитираше корисниците на социјалните мрежи кои пријавија две силни експлозии во градот.
Според извештаите на локалните медиуми, сирените за воздушен напад се активирале во текот на ноќта во Лавов и во многу други региони во Украина. Во меѓувреме, Киев Индипендент вели дека има извештаи дека Лавов е под руски ракетни напади.
– Причината за експлозиите се уште не е позната, а Би-Би-Си не може да ги потврди изјавите на очевидци. Ќе пренесеме повеќе информации откако ќе дознаеме повеќе, објави Би-Би-Си.
Лавов е упориште во западна Украина, каде што моментално се сместени многу странски медиумски тимови, и град во кој минуваат многу бегалци додека излегуваат од Украина.
Известувања за експлозии и во Ивано-Франковск
Очевидци, исто така, изјавија за Би-Би-Си украински дека слушнале експлозии во западниот град Ивано-Франковск. Украинските медиуми исто така известуваат за слични експлозии.
Официјални претставници на Украина: Воениот полигон во Лавов погоден од воздушни напади
Украински воени претставници од Лавов изјавија дека руските сили извршиле воздушен напад и истрелале осум проектили врз Меѓународниот центар за одржување на мирот и безбедност, пренесува Би-Би-Си на украински јазик.
Центарот се наоѓа во областа Јаворив, на околу 30 километри северозападно од Лавов и е воен полигон за обука. Наводно, од областа е забележан голем чад.
Дописникот на Buzzfeed, Кристофер Милер, исто така, објави дека градоначалникот на Лавов го потврдил нападот.
Сирени за воздушен напад во повеќе градови
Сирени за воздушен напад се огласени во неколку делови на Украина, јавува украинската новинска агенција Укринформ. Аларми се огласија во Житомир, западно од главниот град Киев, како и во областите Тернопил, Ривне и Ивано-Франковск на запад.
Сирените се вклучија и во областа Волин на северозапад и Краматорск во источна Украина.