Две сестри на возраст од 4 и 10 години загинаа во тешка сообраќајна несреќа во саботата вечерта на сојузниот пат кај Варбург (Хесен) во Германија. Тие биле во возилото со кое нивниот татко удрил во дрво, објави Феникс Магазин.
Според полицијата, семејството е од Баунатал. Во возилото, покрај возачот и неговите ќерки, биле и 45-годишниот брат на возачот и седумгодишниот син на возачот, кој седел на задното седиште со неговите сестри.
Несреќата се случила во 21:10 часот на федералниот пат јужно од областа Хокстер.
– Возачот возел по сојузниот пат помеѓу Боргентрајх и градот Хоенвепел, кој е дел од Варбург, кога се случила несреќата. Од непозната причина автомобилот излетал од патот надесно, удрил во дрво и застанал во ендек, изјави портпаролот на полицијата.
Според пожарникарите, двете девојчиња биле реанимирани на местото на несреќата. Брзата помош потоа ги однела тешко повредените во болниците во Падерборн, Касел, Хокстер и Варбург.
Девојчињата починале набргу потоа во болница. Според полициските информации, останатите сопатници во возилото не се во животна опасност.