Хрватски RTL известува за нов пример на високи цени на недвижностите во Хрватска, кој доаѓа од Опатија. Таму се продава гарсоњера од 23 квадрати, а по цена од 250.000 евра, што значи дека цената за квадрат е скоро 11.000 евра.

Како што пренесува RTL, првата понуда од 180.000 евра, додека станот се уште бил во фаза на реновирање, сопственикот без размислување ја одбил. Гарсоњерата се огласува во повеќе агенции.

Репортерката на RTL, Маја Бркљача, разговараше со сопственикот на агенција за недвижности во Опатија, Милан Мандиќ, за неконтролираните цени на недвижностите на нашиот пазар.

Неговата оценка е дека состојбата на пазарот на недвижности во Опатија моментално стагнира.

„Последната година има голем пад на продажбата на недвижности и недвижностите веќе нема да може да се продаваат по тие цени“, вели Мандиќ.

Што се однесува до цената на стан во Опатија, вели Мандиќ, тие почнуваат од четири и се искачуваат до осум и десет илјади евра.

„Странците се подготвени да потрошат од 400.000 до 600.000 евра, додека луѓето од Хрватска се подготвени да потрошат од 400.000 до 500.000 евра на имот за одмор. Тоа се најбараните имоти кои најлесно се продаваат и за кои секогаш има побарувачка и купувачи“, објаснува тој.

Тој објаснува дека во овој случај станува збор за недвижен имот од околу 60 квадрати, што значи двособен стан плус дневна. Иако претходно најчести купувачи беа Германците и Австријците, во последните две-три години, вели тој, побарувачката на Унгарците, Словенците, некои Чеси и Словаци прилично пораснала.

„Опатија отсекогаш била посакувана локација и луѓето, особено странците, отсекогаш сакале да имаат недвижен имот овде. Тоа беше прашање на престиж. Корекции на цените ќе дојдат кај оние имоти кои во моментов се прескапи и не го оправдуваат тоа што го нудат“, објаснува тој.

Според него, реалната цена на квадрат во Опатија е шест до седум илјади евра: „Не велам дека е невозможно, но тоа е исклучок“.

На прашањето дали очекува гарсоњерата од почетокот на текстот да се продаде за 250.000 евра, Мандиќ вели: „Со оглед на намалената побарувачка, дали ќе има корекција во тој стан или не, тој стан на крајот ќе заврши да се продаде”.