Австриецот Артур А. (21) денес упаднал во две училници во училиште во Грац со две оружја – пиштол „Глок“ и сачмарка – и отворил оган, испукувајќи 40 истрели.
Во пукотницата загинаа вкупно 11 лица, вклучувајќи двајца наставници и самиот напаѓач, кој се самоубил во тоалетот по злосторството.
Додека еден наставник починал на самото место, лекарите во болницата во Грац залудно се бореле да го спасат животот на една наставничка.
Според извештаите на весникот „Хојте“, жената наводно била пред пензионирање. Единаесет други лица биле сериозно повредени.
Напаѓачот не ѝ бил познат на полицијата
Сторителот, Артур А., го напуштил училиштето пред две години. Според полицијата, тој не бил осудуван и се сметал за неопасен. Речиси и да нема трага од младиот човек на социјалните мрежи; тој се појавува во полициската база на податоци само како жртва на џепарлак.
Сега е познато дека наводно бил подложен на тешка злоупотреба во минатото – дали тоа го предизвикало кривичното дело е сè уште нејасно и е под истрага. Сепак, според медиумските извештаи, тој наводно се сметал себеси за жртва на малтретирање.
Наводно, 21-годишникот поседувал пиштол „Глок“ веќе некое време, а дури неодамна стекнал друго оружје – сачмарка. Веднаш по нападот, полицијата започнала истрага за сторителот. Гласините за можен втор сторител се покажале како неосновани. Полицијата во вторникот попладне потврди дека осомничениот дејствувал сам.
Откриена бомба и проштално видео
При претресот на куќата на Австриецот кој живеел во предградието на Грац – пронајдена е проштална порака. Таму тој снимил и видео за својата мајка. Во неа го објавил злосторството и изјавил дека дејствувал „по своја слободна волја“ .
Според „Хојте“, мајката на напаѓачот го гледала видеото 24 минути откако тој го оставил, но веќе било предоцна.