Иако до локалните избори има повеќе од половина година, веќе избиваат на површина потенцијални кандидати на водечките политички партии, а некои од нив јавно ги истакнаа амбициите да влезат во градоначалничка трка и водат отворена кампања. Притоа, најголем интерес има за Градот Скопје, најголема и највлијателна локална самоуправа на чело со градоначалничката Данела Арсовска, која најави дека нема да се кандидира за нов мандат.
ПОТЕНЦИЈАЛНИ КАНДИДАТИ НА СДСМ
Она што е интересно, на овие интерни анкети на ВМРО-ДПМНЕ се мерел и рејтингот на лица кои владејачката партија оценила дека може да истрчаат како кандидати за градоначалник на Скопје од редовите на опозицискиот СДСМ. Како што дознаваме, еден од нив е поранешниот градоначалник на Карпош и висок функционер на СДСМ Андреј Петров, кој имал највисок рејтинг во конкуренција на другите потенцијални кандидати на социјалдемократите.
Висок партиски функционер на СДСМ, пак, не информира дека Петров ќе биде ставен и на анкетите што тие ќе ги прават, заедно со други потенцијални кандидати. Меѓу нив е претседателот на Градската организација на СДСМ, Ѓорѓи Галетановски, кој периодов изјави дека дали тој ќе биде кандидат за скопски градоначалник ќе зависи од анкетите.
Неофицијално, во игра за кандидат за градоначалник на Скопје од редовите на СДСМ е уште еден висок функционер во новото партиско раководство. Станува збор за потпретседателката Каја Шукова, која за време на претходната влада на СДСМ и ДУИ беше министерка за животна средина и просторно планирање и државна секретарка во истото министерство.
Сепак, според нашите информации, новото партиско раководство на чело со Венко Филипче на ум за градоначалничката трка во Скопје го има и Мишко Ралев, реномиран архитект и универзитетски професор. За потсетување, Ралев стана дел од Извршниот одбор на СДСМ кога на лидерската позиција дојде Димитар Ковачевски на местото на Зоран Заев, но набргу потоа поднесе оставка.
Што се однесува до можните адути на СДСМ за главниот град, добро котирал Андреј Петров, а социјалдемократите ќе го испитуваат рејтингот и Каја Шукова, Ѓорѓи Галетановски, Мишко Ралев, објави ФОКУС.