Таткото (38) починал, а неговиот 4-годишен син е хоспитализиран откако паднале од тераса на шести кат во зграда во Италија.

Инцидентот се случил вчера околу 15 часот во Палермо во станот во кој живееле таткото, инаку универзитетски професор и неговиот мал син.

Професорот починал кратко по пристигнувањето во болница, додека момчето е на интензивна нега.

Момчето е свесно и наводно цело време во болница го барал тато, пренесуваат италијанските медиуми. Неговата мајка починала пред една година.

Момчето има скршена рака и рани на градниот кош и стомакот и е во болница под опсервација.

Полицијата истражува како дошло до несреќата, а Ria news пишува дека не исклучува и самоубиство.

Имено, некои соседи рекле дека таткото се обидел да го спаси синот кој бил наведнат преку балконот и така и двајцата паднале.

Меѓутоа, други велат дека таткото и синот се држеле за рака.

Медиумите јавуваат дека професорот наводно бил под притисок за старателство над синот по смртта на сопругата.

Полицијата продолжува да го истражува случајот.