Една од мајките сподели застрашувачки момент со медиумите за кој вели дека ќе го памети цел живот.
По пукањето во средното училиште БОРГ во Грац, пред блиската сала АСКО владееше паника. Таму беше поставен кризен центар за родители на ученици, а многумина плачеа додека чекаа вести за своите деца. Атмосферата беше тешка, полна со страв, а кризните тимови им помагаа на очајните родители.
Една мајка сподели со медиумите застрашувачки момент за кој вели дека ќе го памети до крајот на животот. „Син ми се јави и ми рече дека е во училиште, дека има пукање и дека мисли дека ќе умре“, изјави мајката за Скај њуз. „Дури сега, два часа подоцна, дознав дека сè уште е жив“, додаде таа.
Додека родителите очајно бараа информации за своите деца, сведоците од соседството опишаа атмосфера на хаос, страв и неверица. Метин Озден, сопственик на ќебапчилница лоцирана само стотина метри од училиштето БОРГ, му раскажа на „Кронен цајтунг“ како првите знаци на трагедијата го затекнале на работа.
„Бев на работа кога дотрчаа првите полициски автомобили, потоа командните автомобили и хеликоптер кружеше над нас“, вели тој. „Знаев дека се случува нешто страшно. Родителите минуваа покрај мојот ресторан во солзи, а некои деца се криеја зад оградата на игралиштето. Ова е трагедија. Шокиран сум“, вели тој.
Сандра Ролер и Франц Вегшајдлер живеат директно преку улицата од училиштето. Сцената што ја виделе од прозорецот на нивниот дом била, велат тие, како кошмар. „Бев во паника. Имам две деца и сè уште сум во шок“, изјави Сандра за „Штиреркороне“. „Видов повредено лице. Мајката не можеше да го најде своето дете. Едно дете не успеа да избега“, вели таа.
Хасан Дарсел, сопственик на ресторанот „Каламар“, кој се наоѓа во близина на училиштето, бил сведок на настаните од прва рака. „Околу 10 часот наутро полицијата дојде и ја блокираше улицата пред мојот ресторан. Ја затворив вратата, бев внатре со мојот готвач. Ова е катастрофа. Децата се во прашање, а јас сум родител на три деца. Секогаш има страв кога ги праќате на училиште – но нешто вакво…“, вели Дарсел.
Во нападот загинаа 10 лица, вклучувајќи го и вооружениот човек кој изврши самоубиство во училишниот тоалет, а беа повредени најмалку 30, од кои некои се во критична состојба. По денешната пукотница во Грац, австриските власти прогласија тридневна национална жалост. Знамињата ќе бидат спуштени на половина копје, а сите јавни прослави се откажани или одложени. Земјата е во шок, додека родителите, децата и целата заедница се обидуваат да ги разберат размерите на трагедијата што ги снајде.