Брана во југозападна Полска попушти под поплава по обилните дождови, додека Чешка и делови од Австрија се уште се справуваат со невремето што ја погоди централна и источна Европа. Едно лице се удави во Полска.

Локалните власти во општината Бистрзица Клоџка во Долна Шлезија објавија дека браната во градот Мјеџигорзе е пробиена и покрај напорите да се пренасочи водата и да се спречи бран од поплава. Регионалната управа за води во Вроцлав ја опиша ситуацијата како критична, поради што селата во пониските региони беа евакуирани.

Браната изградена на почетокот на 20 век во долината Клоѓко на границата меѓу Полска и Чешка е висока 29 метри. Овој резервоар за контрола на поплави може да собере речиси милион кубни метри вода, пренесува ДПА.

Од петокот наутро, во југозападна Полска падна повеќе дожд отколку за време на таканаречената Милениумска поплава во 1997 година, а опасните нивоа на водата беа надминати на 47 мерни станици низ целата земја.

Едно лице се удави, 1.600 евакуирани

Едно лице се удави, а 1.600 луѓе беа евакуирани во областа на градот Клок во југозападна Полска, бидејќи локалните реки достигнаа рекордно ниво и се излеаа во неколку општини по неколкудневните врнежи.

– Ситуацијата е многу драматична. Најдраматично е во областа Клок – изјави премиерот Доналд Туск на новинарите по состанокот со кризниот штаб во градот Клок, пренесува Ројтерс.

Околу 17.000 домаќинства во тој округ останаа без струја и телефонско покривање, а пристапот до некои населени места е практично прекинат, рече Туск. Клоко, град со околу 25.000 жители, е делумно под вода бидејќи нивото на водата на реката достигна височина од 665 сантиметри, што е многу над алармантното ниво од 240 сантиметри и повисоки од рекордните вредности забележани за време на големите поплави во 1997 година кога животот го загубија 56 лица.

Во историскиот град Глухолази, во соседната провинција Ополе, градоначалникот утринава наредил принудна евакуација бидејќи реката почнала да се излева. Пожарникарите, локалните власти и војниците од саботата се обидуваат да го заштитат градскиот мост, покривајќи го со чакал за да биде потежок и поиздржлив.

Пожарникарите од почетокот на викендот помагаат во борбата против поплавите во југозападна Полска, додека за денеска и утре се предвидуваат дополнителни врнежи, што ја влошува ситуацијата.

Бурата Борис ја погоди Источна и Централна Европа со невообичаено силен ветер и поројни дождови во Австрија, Чешка, Унгарија, Словачка, Полска и Романија.