Руското Министерство за одбрана денеска соопшти дека руската армија со хиперсонично оружје уништила голем украински подземен склад за ракети и муниција за авиони во регионот Ивано-Франковск, објавија западните медиуми.
Министерството, исто така, соопшти дека се уништени украинско воено радио и извидувачки центри во близина на Одеса со помош на крајбрежен ракетен систем.
– Авијацискиот ракетен комплекс „Кинџал“ со хиперсонични аеробалистички ракети уништи големо подземно складиште на проектили и авијациска муниција на украинските сили во селото Дељатин, изјави денеска портпаролот на руското Министерство за одбрана, Игор Конашенков.
Западните медиуми додаваат дека не можат независно да го потврдат соопштението на Министерството за одбрана на Русија.
Инаку, Русија досега не призна дека користела суперсонични ракети во борба.
Станува збор за балистички ракети кои можат да летаат во горниот дел од атмосферата пет пати побрзо од брзината на звукот.
Според руската војска, ракетниот систем што се користи во нападот е способен да цели на растојание од повеќе од 2.000 километри и може да ги совлада сите постоечки системи за воздушна и ракетна одбрана, велат од руската војска.
„Оружје како метеор“
Путин го откри оружјето на иднината под името Авангард во 2018 година, заедно со други ветувачки оружја, а беше објавено дека хиперсоничниот систем влезе во редовниот состав на руската армија. Што точно е хиперсонично оружје?
При обраќањето до Федералното собрание, Путин тогаш зборуваше за новите руски воени прокети, а особено внимание му посвети на хиперсоничното оружје.
– Русија има хиперсонично оружје, истакна Путин. Поседувањето на ова оружје е многу важно, затоа што тоа е „идеално“ и речиси неранливо, го сакаат сите западни земји, рече рускиот претседател додавајќи дека тестирањата на овој тип на оружје се веќе завршени.
„Поседувањето на такво оружје, без сомнение, дава сериозна предност во сферата на вооружената борба. Неговата моќ, потенцијалот, тврдат воените стручњаци, можат да бидат огромни, а брзината го прави неранливо кога станува збор за постојните системи за ПРО и ПВО, затоа што пресретнувачките ракети, едноставно кажано, не можат да го стасаат“, соопшти Путин тогаш:
„Завршено е испитувањето на хиперсоничниот авијациски ракетен систем кој нема пандан во светот. Од 1 декември 2017 година системот стапи на борбено дежурство во Јужниот воен округ. Неговата ракета, која лета со хиперсонична брзина, исто така маневрира на сите делови од траекторијата, што овозможува избегнување на сите ПРО системи. Овој систем го доби името „Кинжал“, рече Путин, додавајќи дека се завршени и тестирањата на стратешкиот систем со маневрирачка крстосувачка боева глава.
Тој зборуваше и за беспилотната подморница која може да се движи меѓу континентите на голема длабочина. Во декември 2017 година се завршени тестирањата на нуклеарниот погонски систем за овој тип на подморница.
„Таа сѐ уште нема добиено име. Луѓето можат да ги испраќаат своите предлози на сајтот на Министерството за одбрана“, истакна шефот на руската држава.
Путин зборуваше и за уште еден нов тип на хиперсонично оружје. Тоа ќе биде способно да маневрира во густите слоеви на атмосферата и ќе биде практично неранливо.
„Тоа ќе биде како метеор”, рече Путин. Оружјето засега го доби името „Авангард”.
Путин истакна дека најновите системи за вооружување ќе имаат сериско производство и дека руската држава веќе располага со овие системи.