Чичкото на младата дизајнерка Фросина, која беше прегазена на пешачки премин на Партизанска, Андреј Кулаков, со трогателен статус за неговата внука, но и со моќна порака до младите.
„Фросинче чичино. После тие изложбите, тие ревиите што ги организираа од факултетот, на Фросина ѝ викав: Кога ќе станиш познат дизајнер, јас ќе бидам “чичкото на Фросина”. Она се смееше на тоа, онака, слатко и заразно, како што таа единствено можеше. Сега ми е жал што на ваков трагичен начин станав “чичкото на Фросина”.
Сите се револтирани, оти контрастот е голем. На една страна имаме омилена девојка, која шири ентузијазам насекаде кај што ќе се појави и си има талент што го развива. Наспроти неа имаме деликвент и нарко-дилер, кој повеќе години возел и без возачка дозвола и пијан и правел повеќе прекршоци и кривични дела.
Сега сме сите потресени и згрозени, бидејќи сите се поистоветуваме преку настанот со Фросина. Младите директно со неа, постарите преку своите ќерки, или општо преку своите деца и внуци. Се плашиме дека секој може да биде следен.
Фросина е случајна жртва, но таа не загина случајно. Низа пропусти во општеството доведоа до оваа трагедија. Полицајците 15 пати го фаќале убиецот, ама што фајде кога судиите секој пат го ослободувале. Не можиме ние толку полицајци да ставиме до секој криминалец, колку што можат судиите да ги ослободат.
Судството е рак-рана на општеството, оти корумпираните судии го разоруваат општеството. Немој да мислите дека корумпираните судии прават некаков баланс, па чат-пат пресудуваат погрешно. Уште пред 30 години, некој човек закупи цела страна во весник за да ни објасни:
Корумпираниот судија, никогаш не зема мито од некој што е во право. Оти тој ќе му ги даде парите, ама може и да го издаде, оти човекот си знае дека е во право.
Корумпираниот судија зема мито само од тие што се криви. Оти тие ќе ги дадат парите и цел живот ќе ќутат за таа работа, оти и самите знаат дека се криви. Ете така ни се разорува општеството, од едно малцинство корумпирани судии и обвинители.
Од правен факултет се виде каков правосуден систем изградија. Ќе му влезиме од ФИНКИ, ќе го уредиме салам како што треба. Ќе дојде ред, со Вештачка интелигенција одма ќе детектираме противзаконски пресуди, ќе креваме аларм и одма 5 други судии, одбрани од народот, ќе го проверуваат случајот под итно. Прво, уште одма може роковите да ги скратиме и да нема криење документи по фиоки. А не, Апелација вчера дури пресудила дека убиецот сепак треба да оди во затвор, за друго негово претходно кривично дело. Е па нели можевте пред една недела да заседавате – Фросина ќе беше жива. Шест месеци ви требало за да заседавате. Ама не се ни знае, така вие можеби, по кој знае кој пат и ќе го ослободевте тогаш, и никој немаше ни да разбере. Сега ви се тресат колената од страв да не ве сменат или не дај Боже, да не ви влезе маса народ да ве смени. Оти, ние не ги познаваме вашите правни лавиринти, ама не сме глупи. Не нѐ правете глупи, дека полнолетен нарко-дилер требало да оди во поправен дом за малолетници, наместо во затвор, па ај уште пола година нека се шета на слобода додека ја чека пресудата.
Вам родители, не ви се обраќам директно вам што читате, оти вие сте совесни. Туку преку вас до другите нека допре, сигурно знаете понекои такви. Основната обврска на родителот е да го порасне и воспита детето. Џабе ви се сите школи и сите пари, ако одгледате ѓубре. Мислите дека со подароци може да се купи љубовта на детето, додека вие одите на “афтер-ворк парти”. Не е доволно да му купите лаптоп на детето и да мислите дека тоа само ќе учи во детската. А тоа таму хорор филмови ќе гледа. Или насилни видео-игри ќе игра. Има видео-игри каде буквално се газат луѓе на улица. Убиецот си мислел дека е животот видео-игра, дека сеа тато со врските ќе го спаси уште еднаш од затвор и он пак ќе може да лудува и да премине на следно ниво.
Само Фросина ни ја нема.
А вам младино, ќе ви порачам: престанете со сите пороци. Ниту убиецот не станал нарко-дилер преку ноќ. Од грев во грев, тонел во вителот кон Тамата. Не гледајте холивудски филмови кај што ви викаат дека: ете Исус загинал наместо нас, за да ги измие нашите гревови. И дека, ај 10 пати ќе ја кажиме Аве Марија и сѐ ќе помине.
Не постои такво нешто. Не постои начин своите гревови некој друг да ви ги превземе. Секој од нас, како Исус, си го носи својот крст на плешките, секој ден. Секој е одговорен за своите постапки. Секој ќе си одговара за своите постапки. Ако не според земските закони, има и други казни. Не сме ние тие што ги одредуваат таквите казни и не треба ниту да лицитираме со нив, ама распитајте се, постојат.
За атер на Фросина, во чест на Фросина, вие млади следете го нејзиниот пат. Видете како се гледа нејзиниот напредок од година во година и според начинот како се изразува за своите креации. Можам само да им честитам на нејзините професори.
Само, тоа знаење и талент сега отидоа во ветер.
Да не биде залудна жртвата на Фросина, анѓелчето наше, вие потрудете се да се подобрите.
Развивајте се секој ден, бидете вредни како неа, создавајте, пред вас е животот. Ако сте ученици – учете повеќе. Ако веќе работите – унапредете ја својата пракса. Сакајте и почитувајте ги сите, не правете разлика по вера и нација, како што ни Фросина не правеше разлика. Болката на сите јазици исто боли.
Јас, како татко, чичко, сега веќе и дедо на некои Кулакови, себично-не себично, сепак ќе го кажам: Боже Господи прости ми ако барам премногу, но поштеди нѐ – доволно жртви дадоа Кулакови за Македонија.
Пред 80 години, нашиот дедо Фемо Кулаков загинал, на свои 19 години, за ослободување на Македонија. Сега Фросина Кулакова, на 22 години, загина за освестување на Македонија.
Вечна ѝ слава!“, напиша тој.