Во нападот врз Харков повредени шест лица, дополнително се утврдува бројката на жртви

Во ракетирањето на центарот на Харков повредени се шест лица, од кои едно е дете, а бројката на загинати се утврдува, соопшти Државната служба за вонредни состојби.

Украинските медиуми јавуваат дека е изгаснат пожарот што, по нападот, се појави на покривот од зградата на операта.

Шефот на регионалната државна управа во Харков, Олег Синегубов, изјави дека центарот на Харков и станбените квартови беа нападнати со системите „Град“ и крстосувачки ракети. Од нив, додаде тој, зафатени беа плоштадот во центарот на храдот, каде се наоѓа и зградата на подрачната државна управа.

Државната служба за вонредни состојби претходно соопшти дека во нападот на Харков утринава загинало едно лице, а тројца се повредени.

Варварски напад над Харков

Министерот за надворешни работи на Украина Дмитро Кулеба повика на дополнителни меѓународни санкции против Русија по, како што рече, „варварскиот“ напад на градот Харков.

– Варварски руски ракетни напади врз централниот Плоштад Слобода и станбените области на Харков. Путин не може да ја скрши Украина. Од бес, тој врши повеќе воени злосторства, убивајќи невини цивили. Светот може и мора да направи повеќе. Зголемете го притисокот, целосно изолирирајте ја Русија, напиша Кулеба на Твитер објавувајќи видео од нападот.

Зеленски по нападот врз Харков: Злото мора веднаш да се запре

Злото, вооружено со ракети, бомби и артилерија, мора веднаш да се запре, изјави украинскиот претседател Володимир Зеленски во ново видео на Фејсбук во кое го коментира нападот врз Харков.

– Злото мора економски да се уништи. Мора да покажеме дека човештвото е способно да се заштити себеси, рече Зеленски.

Тој изјави дека Русите знаеле каде пукаат.

– Руските сили денеска брутално го гранатираа Харков. Ова е воено злосторство. Мирно место, мирни граѓани. Без воени објекти. Ова е намерно уништување на луѓе, рече украинскиот претседател.

– Поради ова злосторство дефинитивно ќе оди пред Меѓународниот суд на правдата. Ова е кршење на сите конвенции. Никој во светот нема да ви прости што убивте мирни Украинци, рече Зеленски.