Руското судство го осуди поранешниот началник на секторот за сообраќајна полиција во рускиот Ставрополски регион, Алексеј Сафонов, на 20 години затвор овој понеделник.
Тој беше прогласен за виновен во случај на корупција. Во домот на Сафонов – огромна и раскошна вила што секако не можел да си ја дозволи само со својата полициска плата – истражителите наишле на златен тоалет во една од неговите бањи.
Покрај затворската казна, градскиот суд во Черкасија пресуди дека Сафонов мора да плати и парична казна од 100 милиони рубљи (околу 1,24 милиони долари). Покрај тоа, судот му го одзеде чинот полковник и му забрани да извршува воени или полициски позиции во период од 12 години.
Сафонов беше осуден за две кривични дела – за создавање и водење на организирана криминална група и за примање мито и злоупотреба на службената должност.
Во периодот од 2012 до 2021 година, осудениот и другите учесници во криминалната група заработиле над 21 милион рубљи од нелегални активности.
Покрај својата вила, Сафонов поседувал уште 20 други недвижности и шест автомобили. На социјалните мрежи беа објавени фотографии на кои се гледа вилата, дизајнирана во ексцентричен и екстравагантен стил со антички мебел, пространи соби со големи прозорци и столбови во различни стилови, сите со златни патини.
Самиот Сафонов се изјасни за невин по обвиненијата и рече дека ќе поднесе жалба на пресудата.
