Технологијата за препознавање лица најде една од своите најстрашни примени во војната во Украина. Повеќе од 8.600 лица на загинати или заробени руски војници се скенирани во земјата откако започна инвазијата за нивно идентификување.

Украинската ИТ армија, волонтерска сила составена од хакери и активисти кои добиваат инструкции од владата, вели дека ги користела тие идентификации за да ги информира семејствата за смртта на 582 Руси. Тоа вклучувало испраќање фотографии од напуштените тела на паднатите војници, пишува „Вашингтон пост“.

Украинците се залагаат за употреба на софтвер за скенирање на лицата на американската технолошка компанија „Clearview AI“ како брутален, но ефикасен начин да се поттикне отпорот на инвазијата во Русија и да се обесхрабрат другите борци.

Но, некои воени и технолошки аналитичари се загрижени дека стратегијата може да го разгори гневот поради шокантната кампања насочена кон мајките на руските војници кои на никаков начин не се поврзани со воената машинерија на Кремљ.

Западната солидарност со Украина ја прави примамлива поддршката на таков радикален чин, рече Стефани Хара, надзорен истражувач во Лондон. Сепак, додаде таа, контактирањето со родителите на војниците е „класична психолошка војна“ и може да постави опасен нов стандард за идните конфликти.

– Ако руските војници им го правеа ова на мајките од Украина, можевме да кажеме: „О, Боже мој, тоа е варварско“. И дали навистина функционира? Или ги тера да кажат: „Видете ги овие сурови Украинци, што им прават на нашите момци?“ – рече таа.

Извршниот директор на „Clearview AI“, Хоан Тон-Тат, изјави за „Вашингтон пост“ дека повеќе од 340 службеници во пет украински владини агенции сега можат бесплатно да ја користат нивната алатка за препознавање лица кога сакаат.

Работниците во компанијата сега одржуваат неделни, понекогаш и дневни, онлајн состаноци за обука на полициски и воени службеници кои бараат пристап до алатката откако Украинците ќе видат колку информации – вклучувајќи семејни фотографии, објави на социјалните мрежи и брачен статус – можат да соберат од едно скенирање на труп.

Некои од нив ја користат мобилна апликација за скенирање на лица додека се на бојното поле. Други се пријавија за обука додека биле стационирани на контролен пункт или патрола.

„Clearview AI“ со „Вашингтон пост“ споделија кореспонденција со три украински агенции – Националната полиција, Министерството за одбрана и трета агенција која побара од компанијата да остане анонимна – потврдувајќи дека софтверот е во нивна употреба. Официјални лица од тие агенции и ИТ армијата одбија да коментираат повеќе. Компанијата одби да идентификува две други украински агенции за кои тврди дека моментално го користат нивниот софтвер.

Во мејловите до кои имал пристап „Вашингтон пост“, претставникот на Министерството за одбрана вели дека алатката била тестирана со скенирање фотографии од лицата на загинатите војници и дека биле „пријатно изненадени“ кога софтверот им дал линкови до Инстаграм профили на руски жртви.

Претставник на Националната полиција во мејловите изјавил дека агенцијата го скенирала лицето на неидентификувано тело пронајдено во Харков со наведната глава и дека добила профил на 32-годишен маж кој бил фотографиран со приврзаниците на сепаратистичката група Харковска Народна Република.

Украинските агенции, рече Тон-Тат, исто така ја користат апликацијата за да го потврдат идентитетот на луѓето на воените контролни пунктови и да проверат дали Украинец е можен руски инфилтратор или саботер. Тој тврди дека системот може да ги одврати руските војници од извршување воени злосторства, поради страв да не бидат идентификувани, и додава дека Украинците размислуваат да ја користат оваа алатка за да го потврдат идентитетот на украинските бегалци.

Еден експерт за национална безбедност рече дека односот на Украина кон заробените руски војници, како што е одржувањето прес-конференции со нив и објавувањето фотографии и видеа од нивните лица, во Русија се гледа како на понижување од непријателот.

Таканаречената ИТ Армија на Украина на социјалната мрежа Телеграм објави видеа од делови од разговорот со роднините на загинатите руски војници со кои контактирале. Во еден разговор, некој кому му биле испратени фотографии од раскрвавеното лице на руски војник, одговорил: „Тоа е фотошоп!!! ОВА НЕ МОЖЕ ДА Е ВИСТИНА“. Испраќачот одговорил: „Ова се случува кога испраќате луѓе во војна“.

Во друг разговор била испратена порака до мајка Русинка во која и било кажано дека нејзиниот син е мртов, а потоа и била пратена фотографија од телото на мажот. За да го докаже своето тврдење, испраќачот испрати друга фотографија на која се гледа неговата рака како држи машки воени документи.

„Зошто го правиш ова? Сакаш ли да умрам? Не живеам повеќе. Мора да уживаш во ова“, прашала мајката. Испраќачот одговорил дека младите луѓе веќе умираат, илјадници. Ова е „единствениот начин да се запре сето ова лудило“, напиша тој подоцна и праша „Уште колку луѓе треба да умрат?“.

Претставник на украинското Министерство за дигитална трансформација изјави дека Украина, покрај скенирањето тела, користи и софтвер за препознавање лица за да ги идентификува руските војници фатени на камера како ограбуваат украински куќи и излози.

Овој месец, Михаил Федоров, шефот на тоа министерство, ги сподели на Твитер и Инстаграм името, родниот град и фотографијата на човекот кога рече дека бил снимен како испраќа украдена облека вредна стотици долари од белоруската пошта до неговиот дом во источниот дел на Русија.

– Нашата технологија ќе ги најде сите – напиша тој.

Тон-Тат рече дека единствената амбиција на компанијата е да помогне во одбраната на земјата која е под опсада. Но, тој исто така призна дека војната помогнала да биде „добар пример за американската влада да види како овие примери на употреба функционираат“.

– Ова е нова војна. А Украинците се многу креативни со она што можат да го направат – рече тој.