Десет лица загинаа во Хрватска утрово откако автобус излета од патот кај Славонски брод. Хрватските медиуми првично објавија дека станува збор за автобус со македонски регистерски таблички, за потоа да сменат дека автобусот бил со косовски таблици.
9:15 Десет загинати
Според моментално достапните информации, во сообраќајната несреќа загинале 10 лица, додека десетици се пренесени во болницата во Славонски Брод, пренесува Дневник.хр.
9:05 Автобусот беше полн, не е познато дали има деца во него
Началникот на сообраќајната полиција во полициската станица Славонски Брод, Фрањо Галиќ даде изјава од местото на несреќата.
„Во 06:22 часот, полициското одделение Бродско Посавска доби пријава дека автобус излетал. По пристигнувањето на местото на настанот, утврдено е дека станува збор за автобус со косовски регистарски ознаки на редовната линија Франкфурт – Приштина. Истрагата е во тек. Неколку лица беа загинати, а околу 30 беа пренесени во болница. Сите дополнителни информации ќе бидат достапни по завршувањето на истрагата “, рече Галиќ, пренесува„ Јутарњи лист “. Тој не можеше да каже колку точно луѓе загинале.
„Освен полицијата, на местото на несреќата се и припадници на противпожарната бригада, а брзата помош дошла неколку пати бидејќи дури 30 лица биле пренесени во болницата. Засега не знаеме колку тешко се повредени тие луѓе “, рече Галиќ.
„Сум бил на многу несреќи, но оваа е навистина тешка и мислам дека е една од најсериозните несреќи на кои сум бил сведок. Автобусот беше полн, но не можам да кажам дали има деца меѓу мртвите или повредените. Според патниците, во автобусот имало над 60 лица “, рече Галиќ.
8:58 Полицијата соопшти дека загинале 8 лица
Бројот на загинати лица се искачи на осум, потврди портпаролот на полицијат Дамир Брезиќ.
„Ситуацијата е многу тешка и сè уште има голем број повредени на кои состојбата им е животно загрозувачка“, рече Брежиќ.