ОБНОВЕНО: Не е вистина дека фармацевтите ги кријат причинителите на рак кај луѓето

Не е вистина дека фармацевтите ги кријат причинителите на рак кај луѓето, а митовите за тоа кои производи се причинители на рак треба да се разбиваат со научни факти, а не со верувања. Наведените причинители на рак, посочени во текстот што се споделува во постот, се паушални и базирани на популарни митови, а не наука. Текстот не нуди ниту еден линк и во ниту еден момент не се повикува на научно истражување, туку креира паника и шири дезинформации, потпирајќи се на популарни теории на заговор

Во објава на Фејсбук е споделена вест со наслов:

Фармацевтите тоа го кријат: 10 најголеми причинители на рак кои секојдневно ги користиме

За поголем дел од наброените, наводни причинители на рак во веста постојат истражувања кои докажуваат дека тие не се канцерогени и дека ваквите мислења се митови, додека за останатите, за кои има некакви истражувања кои посочуваат на ризици, во текстот не се повикуваат на наука, туку без контекст и врз основа на популарни верувања се поссочуваат како канцерогени.

Помеѓу наведените причинители во објавениот текст се посочуваат хормони во млекото и месото, мамографија, забен рендген, скенери на аеродром, алуминиум и дезодоранси и антиперспиранти, отровна козметика, ГМО производи, вештачки засладувачи, флуоризирана вода, лекови и вакцини, конзервирана храна како и комерцијален сапун, шампон, паста за заби и креми.

Дел од ваквите тврдења се митови коишто се шират за креирање страв, паника и недоверба кај граѓаните во лекарите и медицината, но дел, како тие за мамографија или забен рендген се и опасни, бидејќи ги демотивираат луѓето да ги користат овие процедури кои може да откријат сериозни и тешки болести.

Мамографите, иако ги изложуваат пациентите на дополнително зрачење, тоа е во висина на двомесечно позадинско зрачење, со кое тие се среќаваат во секојдневниот живот. Истражување од 2016 година ги анализираше годишните или двегодишните мамографи на жени од 40 до 74 години. Заклучокот беше дека често повторувани мамографи го зголемуваат ризикот од развој на рак на дојка, особено кај жените со поголеми гради, но истражувачите истакнуваат дека бенефитите од скринингот се поголеми отколку ризиците од истиот. Националниот институт за рак од САД истакнува дека бенефитите од раното откривање на ракот ги надминуваат ризиците поврзани со мамографите. Според нив, регуларните мамографи помогнале да се намали бројот на смртни исходи од рак на дојка.

Опасно е и тврдењето дека лековите и вакцините се можни предизвикувачи на рак, без да се изнесат какви било податоци и истражувања за тоа. Лековите сами по себе не предизвикуваат рак и тие се тестирани за да носат најголем бенефит и со помалку несакани ефекти врз пациентите. N-Нитросодиметиламин (НДМА), веројатен канцероген, е содржан во одредени лекови, а Агенцијата за храна и лекови на САД има одредено дека максимална количина на НДМА во таблетите може да биде 92 нанограми, со цел да се неутрализираат лошите ефекти. Сепак, откриени се лекови, како лекот Зантак, кој се користи против киселини во желудникот, кој по производството имал само 18 нанограми НДМА во својот состав, но по 12 дена чување на 70 степени Целзиусови, количината се искачила на над 140 нанограми. Оваа екстрeмна појава, сепак, е тешко да се реплицира во реалноста.

За вакцините, пак, не постои никаква поврзаност помеѓу нив и зголемениот ризик од рак. Генерално се препорачува пациентите со рак да не примаат вакцини за време на хемотерапија, имунотерапија или зрачење, освен за вакцинација против грип. На вакцините им е потребен одговор на имунолошкиот систем за да функционираат правилно, а пациентите кои се подложени на третман може да имаат ослабен имунолошки систем.

Исто така, не постојат докази дека дезодорансите и антиперспирантите со алуминиум предизвикуваат рак. Ваквата теорија опстојува подолго време во јавноста и тврди дека алуминиумот во овие производи го спречува телото да се ослободи од токсините преку потта, што предизвикува затнување на лимфните жлезди и предизвикување на рак на дојка. Ова тврдење е погрешно, бидејќи потењето не помага телото да се ослободи од токсини, а ракот на дојка се појавува во градите, па се шири на лимфните жлезди, а не обратно. Дополнително, не постојат докази дека алуминиумот предизвикува рак.

Во текстот лажно се наведува и дека ГМО производите водат кон рак. Не постои потврдена поврзаност помеѓу генетски модифицирани производи, кои во моментов се на пазарот и зголемен ризик од појава на рак. Истражувачите советуваат дека бенефитите од јадењето на овошје и зеленчук, без разлика како се израснати, ги надминуваат потенцијалните ризици од пестицидите користени на нив. „Мајо Клиник“ објави дека диетата богата со соја го намалува ризикот од појава на рак на дојка кај жените и дека се застарени и неточни тврдењата дека сојата и производите од соја предизвикуваат рак.

СЗО неодамна го класифицираше засладувачот аспарам како потенцијално канцероген за луѓето и обезбеди финансии за дополнителни истражувања за тоа да се докажува. Сепак и покрај тоа што аспарам е класифициран како потенцијално канцероген, од СЗО соопштија дека тој е безбеден за користење во умерени количини.

Во текстот повторно се појавува и теоријата на заговор за врската меѓу флуоризирана вода и ризикот од рак. Последните истражувања, користејќи ги податоците за рак, не покажуваат поврзаност помеѓу флуорот во водата за пиење и појавата на рак.

Анализирајќи ги сите наведени причинители на рак посочени во текстот може да се забележи дека текстот не е базиран на факти и тврдењата изнесени во него најчесто се паушални и базирани на популарни митови, а не наука. Текстот не нуди ниту еден линк и во ниту еден момент не се повикува на научно истражување, туку шири дезинформации, потпирајќи се на популарни теории на заговор.

Во текстот недостига повеќе контекст, а повеќето тврдења изнесени во него се невистинити и произволно нафрлени. (vistinomer.mk)