Евгениј Пригожин, шефот на паравоената група Вагнер, која започна вооружен бунт во јуни против Владимир Путин, се наоѓаше во приватен авион што се урна во областа Твер во близина на Москва, при што загинаа сите 10 лица во него, соопштија руските власти.
Росавијација, руската авијациска управа, соопшти дека Пригожин е еден од патниците наведени во деловниот авион „Ембраер“ што се урна во средата вечерта.
Причината за падот не е веднаш јасна, но долгогодишната расправија на Пригожин со војската и вооружениот бунт што тој го водеше во јуни и дадоа доволно мотив на руската држава да возврати. Медиумите поврзани со Вагнер побрзаа да сугерираат дека руски противвоздушен проектил го соборил авионот.
Но, извори блиски до него велат дека иако авионот му припаѓал, тој обично летал со друг авион.
Авионот се урнал во регионот Твер додека летал меѓу Москва и Санкт Петербург. На снимката објавена на интернет очигледно се гледа како малиот авион испушта чад пред да удри во земјата и да се запали.
Авионот наводно имал број RA-02795. Авионот е под американски санкции од 2019 година поради поврзаноста со Пригожин. Беше објавено дека газдата на Вагнер го користел авионот, вклучително и кратко по неговиот неуспешен пуч, кога авионот полета од Санкт Петербург за Белорусија утрото на 27 јуни.