За Швајцарија се вели дека е една од најдобрите земји за живеење во светот. Сепак, таа не би била тоа што е, ако таму животот е ефтин. Србинот Милан В., со години живее во Берн, каде што работи како графички дизајнер за плата од 6.000 франкови (околу 5.500 евра). Тој често добивал коментари од типот „Тебе ти е лесно, живееш во Швајцарија“, па одлучил да раскаже колку навистина чини животот во оваа земја.

„Платата од околу 6.000 франкови звучи одлично, но тоа е бруто сума. Кога ќе се одбие данокот, на сметката ми остануваат околу 4.700 франкови. Најголемиот трошок ми е киријата. Изнајмувањето стан во Швајцарија не е ефтино, но сепак е подобра опција отколку да поседувате недвижен имот, бидејќи даноците на имот се големи (освен ако сте мултимилионер, па можете да си го дозволите тоа)“, објаснува Милан.

Бидејќи изнајмувањето стан во центарот на градот е исклучително скапо, тој одлучил да живее во предградието.

„Изнајмувањето стан со една и пол соба е 1.500 франкови месечно, што значи дека мене од моојата плата ми останауваат 3.200 франкови. Цената на храната во супермаркетите е висока, а да не зборуваме за рестораните. Се обидувам да си готвам храна дома колку што е можно повеќе за да заштедам пари, бидејќи ако јадам надвор многу брзо ќе банкротирам. Трошам околу 600 франкови месечно за храна (затоа што често купувам намирници за дома), што значи дека по овој трошок ми остануваат 2.600. Цената за интернет и мобилни телефони варира од пакет до пакет, мене ова ме чини 160, по што ми преостануваат 2.440. Околу 450 франкови одат за комунални услуги, по што ми остануваат околу 2.000. Во Швајцарија задолжително е и здравственото осигурување, а мојот пакет е малку подобар отколку најосновниот и ме чини 300 франкови месечно“, пишува Милан на својот профил на социјалната мрежа „ТикТок “.

Со преостанатите 1.700 франкови, Милан плаќа уште неколку трошоци.

„Се разбира, фризерот за мене е исто така потребен трошок, па фризурата ме чини околу 40 франкови, а бидејќи се шишам двапати месечно, тоа задоволство ме чини 80 франкови. Покрај тоа, трошам уште 200 – 300 за кино, пијалоци или вечера со пријателите, така што на крајот на месецот ми остануваат околу 1.300 франкови во џебот. За среќа, најчесто се возам со велосипед, па немам трошок за автомобил“, истакнува Милан.

Сепак, и покрај високите трошоци, тој посочува дека Швајцарија е се уште одлично место за живеење.

„Овде постои можност за напредок во кариерата во секој поглед, па и за зголемување на платата. Покрај тоа, голем број компании даваат и целосна 13. плата. Земјата е исклучително уредна, се е јасно прецизирано, законот се почитува, и нема да наидете на непредвидени или непријатни ситуации доколку го почитувате системот кој функционира совршено“, вели Милан.