Србија е потресена од трагичниот случај на 37-годишниот Слободан Селаковиќ од Ваљево, кој починал по, наизглед, рутинска стоматолошка интервенција во приватна ординација во Белград.
Според сведоштвото на неговата сестра, Селаковиќ бил целосно здрав кога седнал на стоматолошката столица, но само неколку часа подоцна бил изнесен во бесознание. По 23 дена поминати во кома, тој починал на 6 март, без да се разбуди.
Од „лесна интервенција“ до животна драма
Семејството тврди дека станувало збор за зафат кој бил претставен како „лесен“, при што требало да му бидат извадени корени од заби и да му се вградат импланти. Била користена т.н. плитка седација, а според сестрата, пред интервенцијата не биле направени дополнителни медицински анализи.
Состојбата нагло се влошила за време на интервенцијата, по што Селаковиќ бил пренесен во Клинички центар во Белград во тешка состојба.
Мозокот останал без кислород
Лекарите утврдиле дека неговиот мозок подолго време бил без доволно кислород, што предизвикало сериозни оштетувања. Во текот на лекувањето се појавиле и низа компликации, меѓу кои и сепса, воспаление на белите дробови и откажување на повеќе органи.
И покрај напорите на медицинските тимови, неговата состојба не се подобрила, а во ноќта меѓу 5 и 6 март неколкупати му запрело срцето. Последната реанимација била неуспешна, по што била констатирана смрт.
Семејството ја бара вистината
Сестрата на починатиот вели дека не обвинува никого директно, но бара одговори за тоа што точно се случило.
„Мојот брат влезе здрав во ординација, а излезе без свест. Нешто се случило таму и мора да се утврди што“, изјавила таа.
По налог на обвинител, извршена е обдукција, а резултатите треба да покажат точна причина за смртта. Истрагата е во тек, а здравствената инспекција најавила дополнителна контрола на работата на ординацијата.
