Властите во Шри Ланка уапсија 22 будистички монаси на меѓународниот аеродром во главниот град Коломбо, откако при контрола на багажот била пронајдена голема количина канабис.
Според информациите, кај монасите биле откриени околу 110 килограми дрога, скриени во нивните куфери. Се наведува дека секој од нив носел по неколку килограми, внимателно сокриени во прегради меѓу лични предмети, вклучително и слатки и други секојдневни работи.
Монасите претходно престојувале во Тајланд, каде што биле на патување финансирано од засега непознат организатор. Дел од нив се млади лица, студенти во будистички храмови, што дополнително ја продлабочува истрагата за нивната можна улога во случајот.
Полицијата не ја исклучува можноста дел од приведените да не биле свесни дека пренесуваат нелегални супстанци. Во меѓувреме, приведен е и уште еден осомничен, за кого се верува дека ја организирал целата операција и ги насочувал монасите да го пренесуваат багажот.
Сите осомничени се задржани во притвор и се подложени на понатамошно испрашување. Надлежните институции работат на утврдување дали станува збор за поширока криминална мрежа која ги користела монасите како курири.
Овој случај предизвика големо внимание во јавноста, бидејќи станува збор за редок и невообичаен инцидент во кој припадници на религиозна заедница се поврзуваат со меѓународен шверц на дрога.