Најнова изјава од МВР за исчезнатата Вања: Го бараме девојчето деноноќно, разговаравме со лица со кои имала комуникација

МВР деноноќно работи на пронаоѓањето на 14 годишната Вања Ѓорчевска од Скопје изјавија за Телма денеска од министерството. Четврти ден се трага по неа, а од вчера се вклучи и Интерпол кој објави информации за исчезнувањето.

„ОНА ШТО НИЕ КАКО МИНИСТЕРСТВО ЗА ВНАТРЕШНИ РАБОТИ ГО НАПРАВИВМЕ ТОА БЕА РАЗГОВОРИ СО ЛИЦА СО КОИ ШТО МАЛОЛЕТНИЧКАТА ИМАЛА КОМУНИКАЦИЈА И РЕДОВНО И ВО ПРЕТХОДНИОТ ПЕРИОД. ПРЕГЛЕДУВАЊЕ НА СНИМКИТЕ ОД БЕЗБЕДНОСНИ КАМЕРИ, КОИ ШТО СЕ НАЈДЕНИ НА ПОДРАЧЈЕТО И СИТЕ ОСТАНАТИ МЕРКИ СОГЛАСНО ВОСТАНОВЕНИТЕ ПРОЦЕДУРИ ЗА ПОТРАГА ПО ЛИЦЕ. ВЕЌЕ ВЕДНАШ СЛЕДНИОТ ДЕН НЕЈЗИНИТЕ ПОДАТОЦИ СЕ СТОП ЛИСТИТЕ НА ГРАНИЧНИТЕ ПРЕМИНИ, А НА БАРАЊЕ НА МИНИСТЕРСТВОТО ЗА ВНАТРЕШНИ РАБОТИ ОБЈАВЕНА Е И МЕЃУНАРОДНА ПОТЕРНИЦА ЗА ПОТРАГА НА ЛИЦЕТО. ЗНАЧИ ИСТРАГАТА ПРОДОЛЖУВА, ДЕНОНОЌНО СО ПРЕЗЕМАЊЕ НА СИТЕ ПОТРЕБНИ МЕРКИ И АКТИВНОСТИ ЗА ЛОЦИРАЊЕ И ПРОНАОЃАЊЕ НА МАЛОЛЕТНИЧКАТА“, ВЕЛИ СУЗАНА ПРАНИЌ ТАЛЕВСКА ОД МВР.

МВР формираше и специјален штаб кој е предводен од началникот на СВР – Скопје. Ѓорчевска исчезна во понеделникот утрината откако го напуштила нејзиниот дом и требало да се упати кон нејзиното училиште „Јохан Хајнрих Песталоци“ во центарот на градот.

„ОД МОМЕНТОТ НА ПРИЈАВУВАЊЕ НА СЛУЧАЈОТ ОД СТРАНА НА НЕЈЗИНАТА МАЈКА НА 27 ОВОЈ МЕСЕЦ ВО 8:35 ЧАСОТ, ЗНАЧИ ПРЕД ТРИ ДЕНА, СЕКТОРОТ ЗА ВНАТРЕШНИ РАБОТИ СКОПЈЕ ГИ МОБИЛИЗИРАШЕ СИТЕ СВОИ КАПАЦИТЕТИ НА НАЈВИСОКО НИВО ЗА ПРЕЗЕМАЊЕ НА МЕРКИ И АКТИВНОСТИ ЗА ПРОНАОЃАЊЕ НА 14 ГОДИШНАТА МАЛОЛЕТНИЧКА. ВО ПРИЈАВАТА МАЈКАТА ИМАШЕ СОМНЕЖ ДЕКА Е ИСЧЕЗНАТА, ПА ОТТАМУ СЛЕДЕА СИТЕ ОНИЕ МЕРКИ РАКОВОДЕНИ ОД СВР СКОПЈЕ“, ДОДАДЕ ПРАНИЌ ТАЛЕВСКА.

Јавноста е на нозе и постојано на социјалните мрежи се споделува нејзина фотографии од граѓаните и повици за сите оние што имаат некаква информација поврзана со нејзиното исчезнување да се јават во полиција. Во потрагата освен полицијата се вклучени и семејството, како и нејзини соученици кои лепеа плакати со фотографијата на Ѓорчевска и бараат какви и да се информации околу тоа каде исчезна малолетничката.

На Ѓорчевска и се губи трага во Дебар Маало во центарот на Скопје за време на утринскиот сообраќаен шпиц. Последниот сигнал од нејзиниот телефон е лоциран на булеварот „Партизански одреди” спроти Универзалната сала.

Според описот на потерницата таа е висока 175 см, тешка е 58 кг, има кафена коса и очи, носи протези и има бемка на десна страна од лицето. Таа била облечена во син блузон, црна јакна и црни фармерки со странични џебови и бели патики со кафеави линии. Со себе носела и ранец и мобилен телефон марка Ајфон.

Ова не е единствениот случај на исчезнато дете во земјава по кое што трага полицијата.Во последните три години во Македонија исчезнале повеќе од 70 малолетници, но најголем број од нив се пронајдени. На сајтот на МВР се уште се активни потрагите по шест деца.

Според Европскиот центар за исчезнати деца, 300.000 деца исчезнуваат секоја година. Секој што има каква било информација за 14-годишната Вања, да пријави на 112.