Регулаторната комисија за енергетика донесе одлука за намалување на малопродажните цени на нафтените деривати.
Во просек поевтинувањето е за 2,73 проценти, во однос на претходната одлука од пред една недела.
Со новата одлука, бензините поевтинуваат за 1,5 денар по литар, а дизелот за 2,5 денари. Нова цена има и за екстра лесното масло за 3,5 денари, додека мазутот се намалува за 2,084 денари по килограм.
Според новата пресметка, од ноќеска на полноќ, Еуросупер БС-95 ќе се продава по 82 денари за литар, додека Еуросупер БС-98 ќе чини 84 денари за литар. Цената на Еуродизелот ќе изнесува 95,5 денари за литар, а екстра лесното масло за домаќинство ќе се продава по 96,5 денари за литар. Цената на мазутот е утврдена на 49,227 денари за килограм.
Од РКЕ посочуваат дека референтните цени на светските пазари бележат пад кај сите деривати, при што најголемо намалување има кај мазутот.
Дополнително, курсот на денарот во однос на доларот бележи благо намалување, што исто така влијае врз конечната пресметка. Во одлуката стои дека станува збор за максимално дозволени цени, а трговците имаат можност да ги формираат и пониско.