Трагедијата што пред две и пол години ја потресе Босна и Херцеговина доби ново, болно продолжение. Во Градачац почина мајката на Низама Хеќимовиќ, која беше погребана покрај гробот на својата ќерка.
Случајот со бруталното убиство на Низама Хеќимовиќ во август 2023 година го шокираше целиот регион. Неа ја уби Нермин Сулејмановиќ, кој злосторството го пренесуваше во живо на социјалните мрежи. По убиството, тој продолжи со насилниот поход во кој беа убиени уште две лица, додека едно лице преживеа со тешки повреди.
И денес, според тврдењата на семејството и дел од јавноста, никој не сносел одговорност за евентуалните пропусти на институциите, иако претходно биле пријавувани закани кон Низама.
На гробиштата во Градачац, покрај гробот на Низама, сега се наоѓа и гробот на нејзината мајка. Големата количина свежо цвеќе сведочи дека споменот на неа не е избледен.
Нејзината сестра, Зијада Хеќимовиќ, кусо изјави дека болката е уште поголема по смртта на мајката.
„Дополнително ми е тешко по смртта на сестра ми и по сè што се случи, навистина ми е тешко да зборувам“, изјави таа.
Оваа нова семејна трагедија повторно ги отвори раните од еден од најпотресните случаи на фемицид во земјата, кој остави длабок белег во јавноста и стана симбол на борбата против насилството врз жените.