Високиот ирански безбедносен функционер Али Лариџани е убиен, објави израелскиот министер за одбрана Израел Кац. Според извештаите на израелските медиуми, Лариџани бил нападнат заедно со неговиот син во скривалиште. Иран сè уште не ја потврдил неговата смрт.
Во својата изјава, Кац рече дека штотуку бил информиран за смртта на висок ирански функционер по израелските напади во текот на ноќта. Тој потврди дека израелските сили го убиле и Голамреза Сулејмани, исто така висок безбедносен функционер и командант на Басиџ.
„Премиерот и јас ѝ наредивме на војската да продолжи да го гони раководството на иранскиот режим на терор и угнетување“, рече Кац.
Али Лариџани беше поранешен ирански преговарач за нуклеарно оружје и близок сојузник на покојниот врховен лидер ајатолахот Али Хамнеи, кој беше убиен на првиот ден од војната. Последен пат беше виден во јавноста минатиот петок, 13 март, кога учествуваше на митинзи по повод Денот на Кудс во Техеран.
На неговиот профил на социјалната мрежа X беа објавени фотографии на кои се гледа како е на улица како мавта и разговара со поддржувачите.
Само еден ден претходно, Лариџани го провоцираше американскиот претседател Трамп на социјалните мрежи.
– Трамп вели дека бара брза победа. Лесно е да се започне војна, но не може да се добие со неколку твитови – напиша тој.
„Нема да попуштиме додека не зажалите за оваа сериозна погрешна проценка“, додаде тој.
Во друг пост, на 10 март, Лариџани рече дека Иран не се плаши од „заканите“ на Трамп, додавајќи дека „дури и најмоќните од вас не успеале да го уништат иранскиот народ“.
„Пазете вие да не бидете елиминирани“, заклучи тој. Иран сè уште официјално не ги коментираше израелските тврдења.
Кој е Али Лариџани?
Али Лариџани е еден од највлијателните ирански политичари во последните децении и беше близок до убиениот врховен лидер ајатолахот Али Хамнеи. Тој моментално го предводи Врховниот совет за национална безбедност, тело кое ги координира клучните одлуки поврзани со одбраната, нуклеарната програма и надворешната политика. Во минатото, тој беше претседател на иранскиот парламент, министер за култура и главен преговарач во нуклеарните разговори со Западот.
Лариџани се смета за прагматичен конзервативец и еден од луѓето кои имаат големо влијание врз стратешките одлуки на режимот, особено во кризни ситуации. Поради неговата долгогодишна поврзаност со Револуционерната гарда и безбедносните структури, тој често се опишува како дел од најтесниот круг на моќ во Техеран, па секоја потврда дека бил цел на израелски напад би претставувала значаен удар врз политичкото и безбедносното раководство на Иран.