Петгодишното момче Рајан, кое четири дена помина во бунар длабок 32 метри, почина кога спасувачите го извлекле од бунарот, соопштија мароканските власти.
Момчето починало пред спасувачите да дојдат кај него, изјавија владини претставници. Петгодишниот Рајан завиткан во жолто ќебе бил извлечен од бунарот и ставен во возило на итна помош.
Како што објавија странските агенции, спасувачите со раце ги ископале последните три метри во бунарот за да не дојде до одрон. Неофицијално спасувачите кога стигнале до малиот Рајан забележале дека тој има повреди на главата и грбот, по што медицинско лице се обидело да го стабилизира пред да го извлече. Потоа Рајан бил завиткан во медицинско ќебе и ставен во возило на Итна помош.
Спасувачките служби во Мароко со денови се обидуваа да стигнат до петгодишниот Рајан, кој пред четири дена падна во јама длабока околу 32 метри.
Во комплицираната спасувачка акција беа вклучени бројни служби, а особено се стравуваше од одрони со оглед на тоа што јамата се наоѓа на свлечиште.
Теренот во тој дел бил составен од мешавина од камења и песок, па спасувачките служби морале да употребат тешка механизација за да стигнат до момчето.
Несреќата се случила кога таткото на Рајан работел на поправка на бунарот.
Кралот Мухамед Шести од Мароко ги повикал родителите на момчето за да им изрази сочувство.
По смртта на петгодишниот Рајан на фејсбук се огласи и францускиот претседател Емануел Макрон.
-Вечерва само сакам да му кажам на семејството на Рајан и на сите Мароканци дека ја делиме нивната болка, напиша Макрон.