Нова снимка од безбедносните камери покажува како вооружен маж ја пробива безбедносната контрола во хотелот „Вашингтон Хилтон“, каде американскиот претседател Доналд Трамп присуствувал на вечерата на дописниците од Белата куќа. Според обвинителите, 31-годишниот Кол Томас Ален е обвинет за обид за атентат врз претседателот и за повеќе дела поврзани со оружје.
На снимката се гледа како осомничениот претходно се движи низ хотелот, а потоа минува низ контролниот пункт со оружје. Обвинителите тврдат дека носел сачмарка, полуавтоматски пиштол и неколку ножеви, додека Трамп, потпретседателот Џеј Ди Венс, членови на кабинетот и други претставници биле евакуирани од местото.
Американските власти наведуваат дека осомничениот пукал кон агент на Тајната служба, кој бил погоден во балистички елек и не бил сериозно повреден. Ален не бил погоден од огнено оружје, но бил повреден при совладувањето и приведен на местото на настанот.
Сепак, неговите адвокати ги оспоруваат тврдењата на обвинителството дека тој пукал. Според Washington Post и Guardian, одбраната укажува дека на снимката не се гледа јасен блесок од истрел, а сè уште се разгледуваат докази и околностите под кои бил погоден агентот.
Ален се соочува со обвиненија за обид за атентат врз претседателот, пренесување огнено оружје меѓу сојузни држави со цел извршување кривично дело и користење оружје во насилен криминал. Тој останува во федерален притвор додека истрагата продолжува.