Со доаѓањето на потоплите денови, змиите стануваат поактивни, а со тоа се зголемува и ризикот од нивни каснувања, предупредуваат здравствените власти.
Докторка од Итната медицинска помош во Тузла, Лејла Кулуглија Мемишевиќ, вели дека најчесто каснувањата предизвикуваат локални реакции како болка, оток и црвенило, но во некои случаи може да се јават и сериозни компликации.
Таа нагласува дека во моментот на каснување најважно е да не се паничи и да се преземат правилни мерки.
„Потребно е местото на каснување да се имобилизира и лицето да мирува, без движење, а потоа што побрзо да се побара медицинска помош“, објаснува докторката.
Што никако не смеете да правите
Според неа, најчестите грешки кои луѓето ги прават може дополнително да ја влошат состојбата:
– не треба да се врзува или стега местото на каснување
– не смее да се вади или „исцицува“ отровот
– не се препорачува ставање ладни или топли облоги
– не треба да се прават резови на раната
Овие постапки не само што не помагаат, туку може да предизвикаат дополнителни оштетувања и компликации.
Посебно загрозени се децата, постарите лица и хронично болните, бидејќи кај нив ефектите од отровот може да бидат посилни и побрзо да доведат до сериозни последици.
Во случај на каснување од отровница, може да дојде до тешки системски реакции, па дури и до откажување на органи ако не се реагира навреме.
Како да се заштитите
Лекарите советуваат при движење во природа да се носат:
– затворени обувки или високи чизми
– долги панталони
– да се внимава при одење низ висока трева, камења и грмушки
Исто така, не се препорачува да се ставаат раце под камења или во дупки без проверка, бидејќи таму често се кријат змии.