Велика Британија воведува една од најстрогите мерки против пушењето во светот – сите лица родени по 2008 година никогаш во животот нема да можат легално да купат цигари или други тутунски производи.
Законот, познат како Закон за тутун и вејпови, веќе помина во британскиот парламент и се очекува наскоро да стапи во сила по формалното одобрување од кралот.
Како ќе функционира забраната
Новите правила предвидуваат постепено зголемување на старосната граница за купување тутун. Тоа значи дека генерациите родени по 1 јануари 2009 година никогаш нема да достигнат законска возраст за купување цигари.
Целта на оваа мерка е создавање „генерација без чад“ и значително намалување на здравствените последици од пушењето.
Проширување на забраните на јавни места
Покрај ова, британските власти планираат и дополнително заострување на правилата за пушење и користење електронски цигари на јавни места.
Забраната ќе се прошири на:
– детски игралишта
– простори околу училишта
– области во близина на болници
Воедно, повеќето затворени простори каде веќе е забрането пушење ќе станат и зони без вејпинг.
Причината: здравјето на нацијата
Според официјалните податоци, пушењето предизвикува десетици илјади смртни случаи годишно и огромен притисок врз здравствениот систем во Велика Британија.
Британските власти сметаат дека со оваа мерка ќе се спречи новите генерации воопшто да започнат со пушење, што долгорочно ќе спаси илјадници животи.