Поради руската агресија врз Украина, членките на НАТО кои граничат со таа држава побараа иницирање на членот 4. од НАТО. Ова не е исто како членот 5. за колективна одбрана, во кој се вели дека напад врз една земја е напад врз сите земји на НАТО, но тоа е чекор кон тој член.
Членот 4. од НАТО значи дека сите сојузници меѓусебно се консултираат кога, според некој од нив, се загрозени нивниот територијален интегритет, политичка независност и безбедност. Овој член може да биде инициран од која било држава.
Естонија, Литванија, Летонија и Полска побараа употреба на членот на НАТО. Во согласност со тоа барање, НАТО ќе се консултира за подготвителни планови за одговор за заштита на секоја нејзина членка од можна руска агресија. Во историјата на НАТО од 1949 година, член 4. од НАТО е инициран само шест пати.
Естонскиот премиер Каја Калас изјави дека „во моментов најефикасната реакција против руската агресија е да се покаже единство. Таа додаде дека нејзината влада е подготвена за оваа криза и внимателно ја следи ситуацијата за да обезбеди заштита на животите на граѓаните“.
„Општата руска агресија е закана за целиот свет и за сите земји на НАТО и мора да се започнат консултации на НАТО за зајакнување на безбедноста на сите сојузници за да се спроведат дополнителни мерки за одбрана на сите сојузници на НАТО“, изјави естонскиот премиер.
Во текот на денот во Брисел ќе се одржат бројни состаноци, меѓу кои и самит на лидерите на ЕУ и состаноци на Советот на НАТО.