Популарниот фолк пејач Дарко Лазиќ (33) се нашол во центарот на инцидент на приватна забава во Виена. Според очевидци, неговиот настап бил прекинат од лихвари кои влегле во салата и насилно го отстраниле пред шокираните гости.
„Ова беше една од поголемите влашки свечености во Виена. Пееја неколку изведувачи, а главна ѕвезда беше Дарко Лазиќ. Сопственикот му плати однапред, а пејачот зеде 14.000 евра за четири часа пеење. Сè одеше добро до половина од неговиот настап, кога одеднаш во салата влегоа некои мажи. Подоцна дознавме дека станува збор за лихвари од кои Дарко позајмил пари со камата и не ги вратил на време. Кога ги виде, Лазиќ побледе и буквално се замрзна. Му го грабнаа микрофонот од рацете и му рекоа веднаш да дојде со нив. Пејачот ги послуша и си замина без збор“, изјави извор за српските медиуми.
Драмата продолжила и надвор од забавата.
„Го ставија Дарко во кола и го одвезоа некаде. Подоцна дознавме дека го однеле во клуб во Виена да пее, и дека веднаш ги зеле парите од оваа забава, што тој не им ги пријавил. Сепак, тоа не беше крајот на проблемот. По неколку дена, Власите итно го замолија Дарко да ги врати парите што ги зел однапред. Подоцна им се јавил да им се извини и им ветил дека ќе пее бесплатно за нив на следната забава што ќе ја организираат, но дека нема пари бидејќи морал да даде сè за да ги врати долговите. Така некако го решија проблемот“, заклучува изворот.